Gənc yazar Dansu Qacarinin dənizçilərə həsr etdiyi şeirlər
Görən gündən aşiqəm, ucaboy Dənizçiyə,
Bu qədər adam varkən, seçdim onu mən niyə?
Ülvi eşqi tapandan ağlımı itirmişəm,
Gəmiyə kəmənd atıb ömrümə gətirmişəm.
Yarıma həmdəm olub qəlbimə toxuyaram,
Ona şeirlər yazıb, mahnılar oxuyaram,
Hər dərdinə dözərəm, həsrətin mən çəkərəm,
Getdiyi dənizlərə baxıb yolun gözlərəm.
O mənim dənizimin sahibi - Dənizçimdir,
Sirdaşı olan gəmi şeir dolu içimdir...
***
Dəniz ağuşuna alırmı səni?
Hərdən də yadına salırmı məni?
Dalğalar çırpanda sərt qayalara,
Ürkərək qaçarsan, de haralara?
Yağışlar yağanda aynada başın
Tökülürmü gözdən inci göz yaşın?
Sınırmı yelkənin qopanda tufan?
Təsəllim gəlirmi ağlına o an?
Qasırğa zamanı batanda gəmin
Dualarım sənlə, Dənizçim mənim...
***
Görməsin, sevməsin dənizlər səni!
Dənizlər almasın səni, Dənizçim!
Daim xatırladır bu izlər səni,
Dənizlər almasın səni, Dənizçim!
"Sənə gələcəm mən" oldu son sözün,
İndi neçə günü mən necə dözüm?..
Hər şeyim səndədir, bir heçəm özüm,
Dənizlər almasın səni, Dənizçim!
Unutma uzaqda bir sevdiyin var,
Şeirlə ovunub özlədiyim yar,
Sonsuz sədaqətlə gözlədiyim yar,
Dənizlər almasın səni, Dənizçim!
