Avstraliyada ilk dəfə ammonyakla işləyən quru yük gəmisinə yaşıl ammonyak yanacağı doldurulub
Avstraliyanın Qərbi Avstraliya ştatında yerləşən Port-Hedland limanında ammonyakla işləyən “Mineral Europa” quru yük gəmisinə ilk dəfə yaşıl ammonyak yanacağı doldurulub. Dünyanın ammonyakla işləyən ilk quru yük gəmisi kimi təqdim olunan 300 metr uzunluğundakı gəmi Çinə göndəriləcək dəmir filizini yükləmək üçün limana daxil olmazdan əvvəl yanacaqla təchiz edilib.
“Seanews.az” xəbər verir ki, “CMB.TECH” şirkətinin idarə etdiyi və Avstraliyanın “Fortescue” dağ-mədən şirkətinin çarterində olan gəmiyə yanacağın bir gəmidən digərinə ötürülməsi təxminən iki saat davam edib. Əməliyyat “Fortescue”, “Pilbara Ports” və “CMB.TECH” şirkətlərinin birgə iştirakı ilə həyata keçirilib.
Əməliyyatdan əvvəl gəmilərin uyğunluğu, ammonyakın yayılma modelləşdirilməsi, fövqəladə hallara müdaxilə prosedurları və əlavə dəniz dəstəyi ilə bağlı hazırlıq işləri aparılıb.
Ammonyak yanacaq kimi istifadə edildikdə karbon qazı buraxmır. Bununla belə, onun ekoloji üstünlükləri istehsal üsulundan və azot oksidi kimi digər emissiyaların nəzarətdə saxlanılmasından asılıdır. Yüksək toksikliyi isə bu yanacağın daşınması və istifadəsində əlavə təhlükəsizlik tədbirlərini zəruri edir.
“Fortescue” şirkəti Port-Hedland limanında əldə olunan təcrübənin regionda alternativ yanacaqlar üçün xüsusi təchizat mərkəzinin yaradılması istiqamətində araşdırmalara da töhfə verəcəyini gözləyir.
