Süveyş kanalından gəmi keçidlərinin sayı artır
Süveyş kanalından keçən konteyner gəmilərinin sayı regiondakı təhlükəsizlik risklərinə inamın artması fonunda yüksəlməkdə davam edir.
“Seanews.az” xəbər verir ki, “MSC” (Mediterranean Shipping Company) marşruta qayıdışı sınaqdan keçirən sonuncu böyük daşıyıcı olub. “Maersk” və “Hapag-Lloyd” xidmətlərinin bir hissəsini yenidən Süveyş kanalı–Qırmızı dəniz marşrutuna qaytardıqlarını, “CMA CGM” isə kanaldan keçən gəmilərinin sayını artırdığını açıqlayıb.
Konteyner daşımaları üzrə analitik şirkət “Linerlytica”nın məlumatına görə, “MSC” son iki həftə ərzində şərq istiqamətində hərəkət edən 7 gəmisini Süveyş kanalı və Bab əl-Məndəb boğazından keçirib. Şirkət bu barədə rəsmi açıqlama verməsə də, rəqiblərinin marşruta qayıtması fonunda geri qalmaq istəmədiyi bildirilir.
“Maersk” və “Hapag-Lloyd” isə daha bir “Gemini Cooperation” marşrutunu Süveyş kanalına qaytarıb. “Linerlytica” “Maersk”in Ümid burnu ətrafından keçən daşımalarının 30 faizdən çoxunu artıq Süveyş marşrutuna yönəltdiyini bildirir.
Süveyş kanalına qayıdış prosesində “CMA CGM” də fəal iştirak edir. Şirkətin 24 000 TEU-luq “CMA CGM Saint Germain”, “CMA CGM Notre Dame” və “CMA CGM Vendome” kimi ən iri konteyner gəmiləri kanaldan keçib.
Süveyş Kanalı İdarəsinin məlumatına görə, 2026-cı ilin əvvəlindən “CMA CGM”ə bağlı 199 gəmi kanaldan keçərək ümumilikdə 5,2 milyon ton xalis yük daşıyıb. “CMA CGM” rəsmiləri isə kanal üzrə keçidlərin sayını daha da artırmaq niyyətində olduqlarını bildiriblər.
