Panama kanalında yüksək rüsumlar LPG daşımalarında yeni marşrut yaradır
ABŞ-dən Asiyaya mayeləşdirilmiş neft qazı (LPG) ixrac edən şirkətlər, o cümlədən “Chevron”, Panama kanalında artan sıxlıq və rekord rüsumlar səbəbindən yeni həll yoluna əl atır.
“Seanews.az” xəbər verir ki, şirkətlər LPG-ni “Panamax” gəmiləri ilə kanaldan keçirərək Panama sahillərində gəmidən-gəmiyə (STS) köçürmə yolu ilə daha iri “Neopanamax” tankerlərinə yükləyir və Asiyaya göndərir.
Məlumata görə, “Chevron” tərəfindən icarəyə götürülən “Fritzi N” və “Pacific Yantai” “Neopanamax” tankerləri Panama kanalının Sakit okean sahilindəki Balboa limanı yaxınlığında LPG qəbul edəcək. Yükün kanaldan keçmiş “Panamax” gəmilərindən alınacağı bildirilir.
Bu dəyişiklik Panama kanalında böyük gəmilər üçün artan gözləmə müddətləri və xərclərlə bağlıdır. Kanalda “Neopanamax” tankerinin rezervasiyasız və dərhal keçidi üçün rüsum ötən həftə rekord həddə – 4,6 milyon dollara yüksəlib.
Bundan əlavə, Mərkəzi Amerikada quraqlığa səbəb olan El-Ninyo hava hadisəsi kanalın su səviyyəsini aşağı salıb. Yaxın Şərqdəki müharibə isə ABŞ-dən Asiyaya enerji daşımalarının artmasına səbəb olub.
“Kpler” şirkətinin məlumatına görə, bu ilin əvvəlindən ABŞ-nin LPG ixracının təxminən 60%-i Asiyaya yönəlib. 2025-ci ildə bu göstərici 55% təşkil edib.
