Amazon çayında quraqlıq konteyner daşımalarına 1 900 dollara qədər əlavə ödəniş gətirib
Amazon çayında suyun səviyyəsinin azalması Manaus limanına çıxışda problemlər yaradıb. Bununla əlaqədar konteyner daşıyıcıları aşağı su səviyyəsinə görə hər konteyner üçün 1 900 dollara qədər əlavə ödəniş tətbiq etməyə hazırlaşır.
“Seanews.az” xəbər verir ki, “MSC” quru konteyner üçün 1 400 dollar, soyuduculu konteyner üçün isə 1 900 dollar əlavə ödəniş müəyyən edib. “ONE” hər konteyner üçün 1 458 dollar, “Maersk” isə 1 228 dollar əlavə ödəniş tətbiq edəcək.
“ONE”nin əlavəsi Rio-Neqro çayında suyun səviyyəsinin müəyyən həddən aşağı düşəcəyi təqdirdə sentyabrın 15-dən idxal, oktyabrın 1-dən isə ixrac yüklərinə şamil olunacaq. Daşıyıcılar əlavə gəmilər, yedək gəmiləri və pilotlar, barjalar, alternativ limanlar və üzən körpülərdən istifadə etməyi planlaşdırır.
“Maersk” isə vəziyyətin oktyabrın sonu–noyabr aylarında daha da çətinləşəcəyini gözləyir. Su səviyyəsinin kəskin azalması halında yüklərin İtakoatiara limanında qismən boşaldılaraq digər nəqliyyat vasitələri ilə Manausa çatdırılması, daha pis ssenaridə isə gəmilərin Manausa ümumiyyətlə daxil ola bilməyərək yükləri üzən körpüdə tam boşaltması nəzərdə tutulur.
Quraqlıq təkcə Amazon hövzəsində deyil, digər mühüm çaylarda da gəmiçiliyə təsir göstərir. Argentinanın Parana çayında, eləcə də Braziliyanın Tapajos çayında suyun səviyyəsinin azalması yük daşımaları üçün risk yaradır.
Avropada isə Reyn və Dunay çaylarında suyun azalması nəticəsində barja daşımaları ciddi məhdudlaşıb. Reyn çayının Kaub məntəqəsində suyun səviyyəsi bu ay 10 santimetrdən aşağı düşüb, Dunayın bəzi hissələrində isə gəmiçilik böyük ölçüdə dayanıb.
