Danubda 70-dək gəmi növbədə qalıb, Ukraynanın taxıl ixracı ləngiyir
Tacir və analitiklərin məlumatına görə, Ukrayna limanlarına taxıl yükləmək üçün Danub çayının Sulina kanalının yaxınlığında 70-dək gəmi növbə gözləyir.
“Seanews.az” xəbər verir ki, pilot çatışmazlığı və digər yüklərə üstünlük verilməsi gecikmələri artırıb.
Rusiyanın hücumlarından sonra Ukraynanın taxıl ixracının təxminən 90%-nin həyata keçirildiyi Qara dəniz limanlarının fəaliyyətinin məhdudlaşması səbəbindən yükdaşımaların bir hissəsi daha aşağı ötürmə qabiliyyətinə malik Danub limanlarına yönəldilib. Taxıl yükləri yanacaq kimi prioritet yüklərlə rəqabət aparır. Hava hücumu xəbərdarlıqları zamanı liman əməliyyatlarının dayandırılması da vəziyyəti çətinləşdirən amillərdəndir.
“ASAP Agri” konsaltinq şirkətinin məlumatına görə, avqustun 25-də Sulina kanalından keçmək üçün 50-dən çox gəmi növbədə olub, Ukraynanın Danub limanlarına isə gündə cəmi 5-7 gəmi hərəkət edib. Hər gecikmə günü gəmi sahiblərinə 8 min dollara qədər əlavə xərc yarada bilər.
“Hazırda Sulina reydində təxminən 70 gəmi gözləyir. Ukrayna limanlarına gedən gəmilər üçün kanalın real ötürmə qabiliyyəti gündə cəmi 2-3 gəmi təşkil edir”, – “Avalon Shipping” şirkətinin nümayəndəsi Katerina Kononenko bildirib.
