Konteyner gəmiləri üçün sifarişlər sürətlə artır
Konteyner gəmiləri üçün qlobal sifariş kitabı rekord sürətlə böyüyür. Bu həftə “Hapag-Lloyd” yeni seriyalı altı 17 000 tonluq konteyner gəmisinin sifariş edib.
“Seanews.az” “Splash”-ə istinadən xəbər verir ki, alman daşıyıcısına tezliklə bir neçə konteyner gəmisi üçün sifariş verməyi planlaşdıran “CMA CGM” və “Evergreen” də qoşulacaq. Bu müqavilələri nəzərə alsaq, cari ilin ilk altı həftəsində sifarişlər ilk dəfə olaraq 9 milyon TEU-nu keçəcək.
“Evergreen” 24 000 TEU tutumlu 11 “Megamax” seriyalı konteyner gəmisi tikmək niyyətindədir. Öz növbəsində, “CMA CGM” Çin gəmiqayırma zavodu “CSSC” ilə 18 min TEU tutumlu gəmilərin daha bir seriyası üçün müqavilə imzalamağı planlaşdırır. Fransız xətti bu yaxınlarda Koreyanın “HD Hyundai Heavy Industries” (“HHI”) tərsanəsində on iki 18 min tonluq gəmi sifariş edib.
Həm Koreya, həm də Çin tərsanələri ilə çoxlu sifarişlər müzakirə olunur. Tankerlərə, qaz daşıyıcılarına və balkerlərə tələbat azaldığından, əksər gəmiqayırma müəssisələri diqqətini konteyner gəmilərinin tikintisi layihələrinə yönəldir.
BIMCO-nun məlumatına görə, dünya üzrə sifariş kitabı 2024-cü ildə 8,3 milyon TEU olub ki, bu da 2023-cü ildəki 7,8 milyon TEU ilə müqayisədə rekorddur.
Dünya konteyner donanmasının hazırkı tutumu 31,7 milyon TEU-dur. Keçən ilin iyun ayında donanmanın daşıma qabiliyyəti 30 milyon TEU idi.
Dünya konteyner donanmasının artım tempi heyrətləndiricidir. 2001-ci ildə 5 milyon TEU-ya çatması üçün təxminən 50 il lazım olub. Amma 20 milyon TEU-dan 30 milyon TEU-ya sıçrayışı üçün isə cəmi yeddi il kifayət edib.
