"COSCO Shipping Development" 23 yeni quru yük gəmisi sifariş edib
"COSCO Shipping Development" (Hainan) şirkəti "COSCO Shipping Development"-in tam mülkiyyətində olan törəmə müəssisə — "COSCO Shipping Heavy Industry" (Dalian) şirkəti ilə 23 ədəd 87 000 dedveyt tonluq metanol istifadəsinə hazır quru yük gəmilərinin inşası üçün müqavilə imzalayıb.
"Seanews.az" xəbər verir ki, yeni gəmilərin ümumi müqavilə dəyəri vergilər istisna olmaqla, təxminən 7,337 milyard yuan (1,032 milyard ABŞ dolları) təşkil edir.
Şirkətin Direktorlar Şurasının məlumatına görə, gəmiqayırma müqavilələri 30 oktyabr 2025-ci il tarixində imzalanıb.
Həmin gün "COSCO Shipping Development" (Hainan) şirkəti həmçinin "COSCO Shipping Bulk" ilə uzunmüddətli icarə sazişi bağlayıb. Razılaşmaya əsasən, gəmilər istismara verildikdən sonra "COSCO Shipping Bulk" tərəfindən icarəyə götürüləcək.
Hər bir gəmi üçün icarə müddəti istismara verildiyi tarixdən etibarən 240 ay (20 il) olacaq. Yeni gəmilərin 2027-ci ilin may ayından 2028-ci ilin sonunadək təhvil verilməsi planlaşdırılır.
Müqaviləyə əsasən, gəmilər sürət, daşıma qabiliyyəti, yanacaq sərfi göstəriciləri üzrə razılaşdırılmış standartlara cavab vermədiyi və ya təhvil verilməsində gecikmə baş verdiyi halda, müqavilə qiymətində azalma tətbiq ediləcək.
Qeyd edək ki, həm "COSCO Shipping Heavy Industry" (Dalian), həm də "COSCO Shipping Bulk" "COSCO Shipping Development"-in nəzarət payına malik əsas şirkət olan "COSCO Shipping"-in törəmə müəssisələridir.
