"Hapag-Lloyd" "Shell" ilə biometan təchizatı üzrə uzunmüddətli müqavilə imzalayıb
Almaniyanın aparıcı konteyner daşıyıcısı "Hapag-Lloyd" şirkəti "Shell Western LNG" ilə biometan (bio-LNG) təchizatı üzrə çoxillik müqavilə bağlayıb.
"Seanews.az" xəbər verir ki, müqavilə dərhal qüvvəyə minib.
Şirkət bildirib ki, biometan "Hapag-Lloyd"-un dekarbonizasiya strategiyasında və 2045-ci ilə qədər “xalis sıfır emissiya” hədəfinə çatmaq planında mühüm rol oynayacaq.
“Həmin razılaşma bizə tullantı əsaslı bərpa olunan yanacaqların donanmamızda istifadəsini genişləndirmək üçün yanacaq təminatında sabitlik və etibarlılıq qazandırır. Bu isə emissiyaları azaltmağa, eyni zamanda müştərilərimizin gözlədiyi keyfiyyət və etibarlılığı qorumağa imkan verir. Bu cür əməkdaşlıqlar göstərir ki, gəmiçiliyin əsl liderliyi gələcək texnologiyaları gözləməkdə deyil, bu gün mövcud olan aşağı emissiyalı yanacaqlardan istifadədədir”, – deyə "Hapag-Lloyd"-un Qlobal yanacaq satınalmaları üzrə Baş direktoru Yan Kristensen bildirib.
"Shell"-in hazırda dünya üzrə 22 LNG bunkerləşdirmə məntəqəsində biometan təchizat imkanları mövcuddur. "Hapag-Lloyd"-a təqdim ediləcək mayeləşdirilmiş biometan "ISCC EU" sertifikatına malikdir və mövcud LNG ikiqat yanacaqlı gəmilərdə heç bir dəyişiklik edilmədən istifadə oluna bilər.
"Shell"-in Qlobal LNG üzrə vitse-prezidenti Dekster Belmar isə qeyd edib: “Bio-LNG artıq konsepsiya deyil, o buradadır və gəmiçiliyin dekarbonizasiyasında yeni mərhələni qidalandırır. Bu cür uzunmüddətli müqavilələr bərpa olunan yanacaqların miqyasının genişləndirilməsi üçün tələb olunan inamı yaradır.”
