"Samsung Heavy" gəmiqayırmada süni intellekt və robot texnologiyalarının tətbiqini genişləndirir
Cənubi Koreyanın "Samsung Heavy Industries" (SHI) şirkəti "Rainbow Robotics" ilə gəmiqayırma robotlarının inkişafı və kommersiyalaşdırılması üzrə anlaşma memorandumunu (MoU) imzalayıb.
"Seanews.az" xəbər verir ki, tərəflər əməkdaşlığa süni intellektlə təchiz olunmuş qaynaq robotlarının hazırlanmasından başlayacaq. Daha sonra mobil ikiqollu robotlar, həmçinin dördayaqlı robotlar üzərində işləniləcək.
Razılaşmaya əsasən, "Samsung Heavy" qaynaq robotların əməliyyat məlumatlarını və sınaq mühitini təmin edəcək, "Rainbow Robotics" isə robot avadanlığı və texnologiyasının inkişafını dəstəkləyəcək.
Şirkətlər həmçinin blokların içində və yamaclarda hərəkət edərək, əyri blokların qaynağını yerinə yetirə biləcək robotların hazırlanmasını hədəfləyir.
"Samsung Heavy" indiyədək blokların qaynağı və boyanması, LNG daşıyıcılarının yük anbarının qaynağı və boru yoxlaması üçün təxminən 90 növ avtomatlaşdırma avadanlığı və robot inkişaf etdirib. Şirkət polad kəsmə zavodunda pilotsuz sistemin qurulmasını tamamlayıb və sentyabrdan bəri 24 saatlıq rejimdə istehsal avtomatlaşdırmasını həyata keçirir.
