"DP World" Londonda yeni konteyner idarəetmə sisteminə investisiya yatırır
"DP World" "London Gateway" logistika mərkəzində 170 milyon funt sterlinq dəyərində yeni konteyner idarəetmə sisteminə investisiya yatırır.
Seanews.az xəbər verir ki, yeni sistem "Empty Superstack" — boş konteynerlərin idarə edilməsinin daha səmərəli üsulunu təklif edir. Bu texnologiya 20 və 40 futluq konteynerlərin tam qapalı avtomatlaşdırılmış sahədə 16 qatadək yığılmasına imkan verir.
Sistemin müəllifi "DP World" və Almaniyanın "SMS Group" şirkətlərinin birgə müəssisəsi olan "BOXBAY"-dır.
Tam elektriklə işləyən "stacker crane" qurğuları konteynerləri yüksək dəqiqliklə idarə edir, eyni zamanda yenidən yükləmə və sahə nizamlaması ehtiyacını azaldaraq liman performansını artırır.
Layihənin iki il ərzində tamamlanacağı bildirilir.
"BOXBAY" sistemi daha əvvəl "DP World"-ün Dubaydakı "Cebel Əli" limanında sınaqdan keçirilmiş və 500 min TEU konteyneri idarə etmişdir. Enerji bərpası və dizayn xüsusiyyətləri sayəsində bu sistem dünyanın ən səmərəli konteyner idarəetmə texnologiyalarından biri hesab olunur.
