"DNV" hesabatı: Metanol dəniz yanacağı kimi yüksək hazırlıq səviyyəsindədir, lakin tətbiqinə dair maneələr qalmaqdadır
Metanol gəmiçilik üçün praktik və miqyaslana bilən alternativ yanacaq kimi önə çıxıb.
"Seanews.az" xəbər verir ki, bu barədə məlumat Norveç Dəniz Tətbiqləri və Sertifikatlaşdırma Təşkilatının (DNV) yeni hesabatında yer alıb.
Hesabata görə, hazırda 450-dən çox metanolla işləyə bilən gəmi istismarda və sifariş mərhələsindədir.
Bununla belə, hesabatda bildirilib ki, yanacağın yüksək qiyməti və məhdud mövcudluğu hələ də əsas maneələrdir: "2025-ci ildə bio-metanolun orta qiyməti tonuna 2 500 ABŞ dolları təşkil edib ki, bu da dəniz dizel yanacağı ilə müqayisədə xeyli bahadır. Qlobal istehsal isə gözlənilən tələbi ödəmək üçün kifayət etmir."
“DNV” vurğulayır ki, metanolun geniş tətbiqi IMO-nun "Net Zero" hədəfləri və "FuelEU Maritime" kimi tənzimləyici çərçivələrdən asılı olacaq.
Ekspertlərin məlumatına görə, müasir iki yanacaqlı (dual-fuel) mühərriklər artıq 600 min saatdan çox metanol üzrə əməliyyat təcrübəsi toplayıb və yüksək etibarlılıq nümayiş etdirir.
Hesabatda qeyd olunur ki, metanol mühərrikləri yanacaq çevikliyi təmin edir və mövcud bunkerləşdirmə infrastrukturu ilə uyğunluğu səbəbindən limanlarda tətbiqi daha asan və sərfəlidir.
