"DNV" ammonyakla işləyən iki yanacaqlı ultra böyük konteyner gəmisi layihəsi üçün ilkin təsdiq verib
"DNV" təsnifat qurumu "MSC", "Zhoushan Changhong International" və "CIMC ORIC" konsorsiumuna 21 700 TEU tutumlu ammonyakla işləyən iki yanacaqlı ultra böyük konteyner gəmisi layihəsi üçün İlkin Təsdiq (Approval in Principle – AiP) verib.
"Seanews.az" xəbər verir ki, layihəyə görə, gəmi yeni nəsil ammonyakla işləyən iki yanacaqlı mühərriklərlə və böyük ölçülü "C"-tipli ammonyak tankları ilə təchiz ediləcək.
Gəminin gövdə dizaynında vertikal baş quruluşu, optimallaşdırılmış arxa və gövdə xətləri, aşağı müqavimətli örtüklər və yanacaq qənaətini artıran hidrodinamik xüsusiyyətlər yer alır. Layihə təsdiqi CFD simulyasiyaları və model sınaqları vasitəsilə aparılıb.
"DNV" mütəxəssisləri layihəni yanacaq sistemləri, hərəkət-qüvvət qurğusu və ammonyakın təhlükəsiz istifadəsi ilə bağlı beynəlxalq standartlara uyğun olaraq qiymətləndirib.
"DNV"-nin vitse-prezidenti Norbert Kray qeyd edib ki, ammonyakla işləyən iki yanacaqlı dizaynlar artıq konsept mərhələsindən sifariş və yaxın gələcəkdə təhvil mərhələsinə keçməkdədir. Onun sözlərinə görə, bu təsdiq ammonyak yanacağının böyük konteyner gəmiləri üçün real tətbiq oluna biləcəyinə dair inamı artırır.
Layihənin növbəti mərhələlərində təhlükəsizlik üzrə daha geniş analizlərin və yanacaq sisteminin inteqrasiyasının həyata keçirilməsi planlaşdırılır.
