Ammonyakla işləyən gəmi mühərrikləri üçün təhlükəsizlik tələbləri yenilədi
Beynəlxalq Təsnifat Cəmiyyətləri Assosiasiyası (IACS) UR M78 standartına əhəmiyyətli dəyişiklik edib və ammonyak yanacağı ilə işləyən gəmi mühərrikləri üçün əsaslı təhlükəsizlik tələblərini təqdim edib. Bu addım gəmiçilik sənayesində karbonsuz yanacaqlara keçid və emissiyaların azaldılması istiqamətində mühüm mərhələ hesab olunur.
“Seanews.az” xəbər verir ki, yenilənmiş Rev.4 versiyası artıq ammonyakı “reciprocating” (pistonlu) daxili yanma mühərrikləri üçün təsdiqlənmiş yanacaq kimi əhatə edir. Bu isə həm risklərin idarə olunması, həm də zəhərli maddələrin sızmasının və partlayışların qarşısının alınması baxımından vacibdir.
Dəyişikliklərə əsasən UR M78 indi ammonyak (anhidrous), təbii qaz, etan, LPG, metanol və etanol ilə işləyən mühərrikləri əhatə edir.
Yeni tələblər arasında qazın geri alınması sistemləri və Ammonyak Sızma Azaltma Sistemi (ARMS) yer alır ki, sızmalar və zəhərli maddələr effektiv şəkildə idarə olunsun.
Bu dəyişiklik gəmi sahiblərinə, dizaynerlərə və mühərrik istehsalçılarına karbonsuz gəmiçiliyə keçid prosesində daha aydın və təhlükəsiz çərçivə təqdim edir. IACS-in bu addımı həm qlobal təhlükəsizlik, həm də sənayedə innovasiya və davamlılıq baxımından əhəmiyyətli sayılır.
Rev.4 1 iyul 2027-ci ildən etibarən, tip təsdiqi üçün müraciət edən bütün mühərriklərə IACS-a üzv cəmiyyətlər tərəfindən tətbiq ediləcək.
