Dənizin gücü elektrik şəbəkəsində: Dalğa enerjisi qurğusu sınaqdan keçirildi
Niderlandın “Wave Energy Collective” (“Weco”) şirkəti tərəfindən hazırlanmış “Kaizen 2.0” dalğa enerjisi qurğusu Şimal dənizində ilk sınaq mərhələsini uğurla başa vurub.
“Seanews.az” şirkətin məlumatına istinadən xəbər verir ki, qurğu təkmilləşdirilmiş quraşdırma proseduru ilə dənizə yerləşdirilib və ilk gecə ərzində bütün sensorlar, monitorinq və rabitə sistemləri normal fəaliyyət göstərib. İlkin nəticələr sistemin real dəniz şəraitində işləkliyini təsdiqləyib.
Növbəti mərhələdə qurğunun daha sərt açıq dəniz şəraitində uzun müddət sınaqdan keçirilməsi və performans göstəricilərinin monitorinqinə başlanılması planlaşdırılır.
Dalğa enerjisi qurğuları dəniz dalğalarının hərəkətindən elektrik enerjisi istehsal etmək üçün nəzərdə tutulur və gələcəkdə sahil elektrik şəbəkəsinin, liman infrastrukturunun və digər dəniz obyektlərinin enerji təminatında istifadə oluna bilər.
Layihə “Kansen voor West” proqramı (EFRO 2021–2027) və Cənubi Hollandiya vilayəti tərəfindən dəstəklənir, Avropa İttifaqı ilə birgə maliyyələşdirilir.
