Dəniz əməliyyatlarında xərcləri azaldacaq robot texnologiyasına böyük dəstək verilib
İtaliyanın "Mirai Robotics" startapı dəniz əməliyyatlarını avtomatlaşdıran muxtar sistemlər hazırlamaq üçün 4,2 milyon dollar investisiya cəlb edib. Bu maliyyələşmə İtaliyanın robototexnika sahəsindəki ən mühüm addımlarından biri hesab olunur.
“Seanews.az” xəbər verir ki, şirkət bununla dəniz sahəsindəki kadr çatışmazlığı və yüksək xərclər kimi problemləri aradan qaldırmağa çalışır. Belə ki startap tərəfindən yaradılan sistemlər dənizlərdə daimi nəzarət və patrul xidmətini təmin edir. Süni intellektlə idarə olunan bu vasitələr həm mülki, həm də təhlükəsizlik məqsədləri üçün istifadə edilə bilər. Artıq şirkət sahil və dəniz əraziləri üçün iki fərqli muxtar nəqliyyat vasitəsi hazırlayıb.
“Mirai Robotics” bu investisiyanı texnoloji bazasını gücləndirmək və mütəxəssis komandasını böyütmək üçün istifadə edəcək. Yaxın gələcəkdə sənaye tərəfdaşları ilə yeni sınaq layihələrinin icrası planlaşdırılır.
