Gəmi yanacağı satınalmasında şəffaflığı artırmaq üçün yeni süni intellekt agenti təqdim edilib
Kopenhagen mərkəzli “Tideform” şirkəti, dəniz yanacağı bazarındakı dəyişkənliyi analiz etmək və peşəkarlara dəstək olmaq məqsədilə "Atlas" adlı yeni süni intellekt (AI) agentini öz platformasına inteqrasiya edib.
“Seanews.az” xəbər verir ki, bu texnoloji yenilik bazar kəşfiyyatı ilə satınalma infrastrukturunu bir araya gətirərək sektorda şəffaflığı artırmağı hədəfləyir. Belə ki "Atlas" sistemi mesajlaşma interfeysi vasitəsilə istifadəçilərə real vaxt rejimində qiymət proqnozları və trend analizləri təqdim edir.
Platforma 500-dən çox limanda illik 30 milyon tondan artıq bunker yanacağı tədarükü haqqındakı məlumatları strukturlaşdırır. Süni intellekt bu nəhəng datanı emal edərək treydinq və maliyyə komandaları üçün dəqiq qiymət indikatorlarına və gələcək trend əyrilərinə çevirir.
Sistem mürəkkəb alqoritmləri peşəkar treyder və analitiklərin dənizçilik təcrübəsi ilə birləşdirir. Bu, həm ənənəvi, həm də yeni nəsil ekoloji yanacaq növləri üzrə məlumatların yüksək dəqiqliklə işlənməsinə imkan verir.
