Gəmilərdə nasazlıqlar artıq AR eynəkləri və məsafədən idarəetmə ilə aradan qaldırılacaq
İsveç texnologiya nəhəngi "Alfa Laval" dənizdəki gəmilərə fasiləsiz ekspert dəstəyi təmin etmək üçün Genişləndirilmiş Reallıq (AR) əsaslı məsafədən xidmət alətlərini inkişaf etdirir. Şirkət "Maersk", "Anglo-Eastern" və "Everllence PrimeServ" ilə birgə keçirdiyi sınaqlar vasitəsilə bu rəqəmsal alətlərin effektivliyini artıq təsdiqləyib.
“Seanews.az” xəbər verir ki, sınaqlar çərçivəsində ballast sularının idarə edilməsi sistemləri (BWMS), yanacaq və sürtkü yağı təmizləyiciləri, həmçinin yağlı suyun ayrılması sistemlərində yaranan nasazlıqlar AR texnologiyası ilə məsafədən aradan qaldırılıb.
Bu texnologiya sayəsində sahildəki ekspertlər gəmi heyətinin gördüyü hər şeyi real vaxt rejimində izləyir və onlara mürəkkəb tapşırıqları addım-addım yerinə yetirmək üçün vizual rəhbərlik edirlər.
"Alfa Laval"ın texnoloji inkişaf üzrə vitse-prezidenti Sören Helmuth Jensen bildirib ki, AR dəstəkli kömək artıq real hallarda — qazanların qəza vəziyyətində idarə olunması, separatorların manual boşaldılması, şirin su generatorlarının (FWG) vəziyyətinin qiymətləndirilməsi və metanol yanacaq sistemlərindəki nasazlıqların aradan qaldırılmasında uğurla tətbiq edilib.
Bu innovasiya gəmilərin limana gəlməsini gözləmədən texniki problemlərin dərhal həllinə və avadanlıqların səmərəliliyinin artırılmasına imkan yaradır.
