Örtük nəhəngi "PPG" gəmi sahiblərinə xərcləri azaltmağa kömək edən yeni analitika platformasını təqdim edib
Dünyanın aparıcı boya və örtük istehsalçısı olan "PPG" şirkəti, dənizçilik sektorunda gəmi ehtiyat örtüklərinin satınalma məlumatlarını idarə etmək üçün xüsusi analitika platformasını istifadəyə verib.
“Seanews.az” xəbər verir ki, "PPG InsightsNav" dəniz örtükləri ilə bağlı məlumatları standartlaşdırılmış və istifadəçi dostu formatda təqdim edir. Bu sistem gəmi sahiblərinə və donanma operatorlarına xərcləmə nümunələrini izləmək, gələcək ehtiyacları proqnozlaşdırmaq və qənaət imkanlarını müəyyən etməyə şərait yaradır.
Uzun müddətdir ki, bu sahə pərakəndə məlumatlar və məhdud şəffaflıqdan əziyyət çəkirdi. İndi isə real vaxt rejimində yenilənən interaktiv idarəetmə panelləri tədarük və texniki idarəetmə komandalarına öz tarixi satınalma məlumatlarını müstəqil təhlil etməyə imkan verir. Bu da sifarişlər üçün liman seçimini optimallaşdırmaq və xərcləri azaltmaq üçün strateji satınalmaları birləşdirmək deməkdir.
Platforma hazırda bütün dünyada "PPG" müştəriləri üçün təhlükəsiz onlayn portal vasitəsilə əlçatandır.
