“EcoNavis” külək rotorlarının təkmilləşdirilmiş dizaynını sınaqdan keçirəcək
Şotlandiyanın “EcoNavis Solutions” şirkəti gəmilərdə yanacaq qənaəti üçün istifadə edilən külək rotorlarının səmərəliliyini artıracaq texnoloji yenilik hazırlayıb.
“Seanews.az” xəbər verir ki, şirkət "Scottish Enterprise" tərəfindən ayrılan 100 000 funt-sterlinqlik tədqiqat qrantı sayəsində öz konsepsiyasını sınaq və nümayiş mərhələsinə keçirir.
1920-ci illərdən bəri dəyişməz qalan klassik rotor texnologiyası küləyin istiqaməti dəyişdikdə səmərəliliyini itirir və mürəkkəb marşrut planlaması tələb edir. “EcoNavis”in patentləşdirdiyi yeni "quyruq əlavəsi" qurğusu rotorun arxasındakı hava axınını optimallaşdıraraq onun daha geniş külək bucaqlarında işləməsinə şərait yaradır. İlkin simulyasiyalar göstərir ki, bu yenilik itki enerjisini bərpa etməklə itələmə qüvvəsini 10% artırır, eyni zamanda enerji sərfiyyatını 5% azaldır.
Şirkətin icraçı direktoru Batuhan Aktaş bildirib ki, bu dizayn gəmi sahiblərinə marşrut seçimində daha çox çeviklik və il boyu daha sabit səmərəlilik təklif edəcək. Ümumi dəyəri 265 000 funt-sterlinq olan layihənin növbəti mərhələsi fiziki sınaqların keçirilməsindən ibarət olacaq.
