Süni intellektli naviqasiya köməkçisi Aralıq dənizində sınaqdan keçirilib
Böyük Britaniyanın təsnifat cəmiyyəti "Lloyd’s Register" (LR) Aralıq dənizinin sıx hərəkətli sularında süni intellekt (Sİ) dəstəkli naviqasiya sistemlərinin real sınaqlarını uğurla başa vurub.
“Seanews.az” xəbər verir ki, İtaliyanın Coya-Tauro limanından Maltanın Marsaşlokk limanına qədər olan 828 dəniz millik məsafədə keçirilən sınaqlar zamanı "Orca AI" şirkətinin kompüter görmə platforması fider tipli konteyner gəmisində yoxlanılıb. Beş günlük qiymətləndirmə prosesində əsas diqqət görmə qabiliyyətinin zəif olduğu və gəmi hərəkətinin intensivləşdiyi şəraitdə Sİ-nin kapitan körpüsü heyətinə necə dəstək verdiyinə yönəlib.
Sınaq müddətində süni intellekt platforması radar və AIS (Avtomatik Tanınma Sistemi) kimi ənənəvi cihazların aşkar edə bilmədiyi kiçik qayıqlar və aşağı siqnallı hədəflər də daxil olmaqla cəmi 739 obyekti qeydə alıb. Sistem 94% dəqiqlik və 98,6% aşkaretmə dərəcəsi nümayiş etdirərək bütün səfər boyu fasiləsiz çalışıb. Gəmi körpüsünə quraşdırılan termal və gündüz kameraları vasitəsilə 360 dərəcəlik görüntünü təmin edən bu texnologiya rəqəmsal növbətçi rolunu oynayaraq hədəfləri real vaxt rejimində izləyir.
Layihə çərçivəsində təkcə texniki göstəricilər deyil, həm də insan amili və texnologiyanın heyətlə qarşılıqlı əlaqəsi araşdırılıb. "Lloyd’s Register" nümayəndələri qeyd ediblər ki, bu cür sistemlər qərar qəbuletmə vaxtının məhdud olduğu dar keçidlərdə və liman yaxınlaşmalarında naviqasiya risklərini minimuma endirir. "Orca AI" rəsmiləri isə sınaqların nəticələrinin süni intellektin artıq gələcək konsepsiyası deyil, real əməliyyatlarda ölçülə bilən dəyər yaradan bir vasitə olduğunu və muxtar gəmiçiliyə gedən yolu sürətləndirdiyini bildiriblər.
