Gəmilərin kiber müdafiəsi süni intellektə həvalə olunur
Dənizçilik sahəsində peyk rabitəsi və rəqəmsal həllər üzrə dünya nəhəngi olan "Marlink" gəmilərin kiber müdafiəsini yeni səviyyəyə qaldırır. Şirkət bunu üçün "Stellar Cyber"in süni intellekt əsaslı texnologiyasını öz platformasına inteqrasiya edib.
"Seanews.az" xəbər verir ki, bu tərəfdaşlıq sayəsində gəmi və sahil sistemləri arasındakı informasiya texnologiyaları (IT) və əməliyyat texnologiyaları (OT) mühitində təhlükələrin aşkarlanması və onlara qarşı cavab tədbirlərinin görülməsi xeyli sürətlənəcək.
"Open XDR" arxitekturasına əsaslanan yeni sistem statik qaydalar əvəzinə süni intellektə söykənən davranış monitorinqi tətbiq edərək təhlükəli trafikin və naməlum cihazların dərhal müəyyən edilməsinə imkan yaradır.
"Marlink Cyber" şirkətinin prezidenti Nikola Furjenin sözlərinə görə, bu yenilik həm ticarət gəmiçiliyi, həm də ofşor enerji sektoru üçün kiber dayanıqlılığı artırmaqla yanaşı, donanmaların təhlükəsizlik idarəetməsini də sadələşdirir.
Müasir dənizçilikdə haker hücumlarının daha mürəkkəb xarakter almasını nəzərə alsaq, bu cür avtomatlaşdırılmış müdafiə sistemlərinin tətbiqi həm qlobal, həm də yerli dənizçilər üçün naviqasiya və rabitə təhlükəsizliyinin qorunmasında həlledici rol oynayacaq.
