Dənizçilikdə yeni təhlükəsizlik standartı: "Corvus Energy"nin batareya sistemləri kiber-hücumlardan qorunacaq
"Corvus Energy" şirkəti "Dolphin NxtGen" batareya enerji saxlama sistemləri (BESS) üçün DNV təsnifat cəmiyyətindən rəsmi kibertəhlükəsizlik sertifikatı alıb. Bu sertifikat gəmilərin enerji sistemlərində rəqəmsal təhlükəsizlik standartlarının sərtləşdirilməsi yolunda mühüm addım hesab olunur.
"Seanews.az" xəbər verir ki, təsdiq prosesi zamanı sistem arxitekturası, girişə nəzarət, məlumatların qorunması və proqram təminatının təhlükəsiz uzaqdan yenilənməsi daxil olmaqla, 50-dən çox funksiya müstəqil ekspertlər tərəfindən yoxlanılıb. Sertifikat həmçinin gəmilərin monitorinqi və diaqnostikası üçün istifadə olunan "Lighthouse" rəqəmsal platformasını da əhatə edir.
Müasir gəmiçilikdə rəqəmsal idarəetmə sistemlərindən asılılıq artdıqca, kiber-risklər də ciddi şəkildə yüksəlir. Xüsusilə hibrid və sıfır emissiyalı gəmilərdə kritik infrastruktur sayılan enerji saxlama sistemlərinin kiber-hücumlardan qorunması artıq gəmi təhlükəsizliyinin ayrılmaz hissəsinə çevrilib.
"Corvus Energy"nin baş icraçı direktoru Fredrik Vitte bildirib ki, kibertəhlükəsizlik indi dəniz təhlükəsizliyi üçün avadanlığın özü qədər fundamental əhəmiyyət kəsb edir.
Qeyd edək ki, dünyada sıfır emissiya texnologiyası ilə işləyən gəmilərin yarısından çoxu məhz bu şirkətin sistemləri ilə təchiz olunub və yeni sertifikat dəniz nəqliyyatında rəqəmsal təhdidlərə qarşı dayanıqlığı təmin edən yeni bir standart müəyyənləşdirir.
