Avtonom gəmi (USV) texnologiyasında rekord müəyyən edilib
"Maritime Tactical Systems, Inc." (MARTAC) şirkətinə məxsus "T38 Devil Ray" pilotsuz suüstü aparatı (USV) Kaliforniya sahillərində rekord dərəcədə uzun — tam 8 günlük avtonom missiyanı uğurla başa vurub. Bu sınaq öz sinfində dözümlülük, etibarlılıq və əməliyyat nəzarəti baxımından yeni bir mərhələ hesab olunur.
"Seanews.az" xəbər verir ki, əvvəlki sınaqlardan fərqli olaraq gəmi heç bir müşayiətçi qayıq və ya kənar dəstək olmadan, real dəniz şəraitində fəaliyyət göstərib.
T38 naviqasiya zamanı qarşısına çıxan statik və hərəkətli obyektlərdən manevr edərək yayınıb və bununla da öz avtonom proqram təminatının beynəlxalq dəniz toqquşmalarının qarşısının alınması qaydalarına (COLREG-72) tam uyğun olduğunu sübut edib.
Missiya zamanı 400 mil uzaqlıqda bilərəkdən tək mühərriklə iki günlük əməliyyat keçirilib. Məqsəd gəminin yanacaq qənaəti və dözümlülük limitlərini yoxlamaq olub. Gəmi "dözümlülük rejimi"ndə 2400 dəniz milindən çox məsafə qət etmək qabiliyyətini təsdiqləyib. Eyni zamanda lazım gəldikdə 50+ uzel (knot) sürət toplamaq imkanını nümayiş etdirib.
Bunlarla yanaşı, gəminin karbon lifli katamaran gövdəsi 5 ballıq dəniz şəraitində (dalğa hündürlüyü 3 metrədək) yüksək stabillik nümayiş etdirib. Bu, yüksək dəqiqlikli sensor məlumatlarının toplanması və çətin hava şəraitində stansiya saxlama imkanı üçün həlledici rol oynayır.
Bu uğurlu missiya uzaq və çətin dəniz mühitlərində logistik asılılığı azaldan, uzunmüddətli kəşfiyyat və mühafizə əməliyyatları üçün yeni imkanlar açır.
