Dənizçilik sektoru üçün yeni kiber təhlükəsizlik platforması təqdim edilib
Dəniz texnologiyaları şirkəti “Navarino” dənizçilik sektoru üçün nəzərdə tutulmuş yeni kiber təhlükəsizlik xidmətini – “Ozora” platformasını istifadəyə verib.
“Seanews.az” xəbər verir ki, yeni həll gəmi operatorları üçün kiber təhlükəsizliyi sadələşdirərək bütün əsas müdafiə funksiyalarını vahid sistemdə birləşdirir. Platforma şəbəkə təhlükəsizliyi, uç nöqtələrin (endpoint) qorunması və təhlükəsizlik monitorinqini əhatə edən inteqrasiya olunmuş müdafiə səviyyəsi yaradır.
Sistem gəmi arxitekturasından asılı olaraq ya bulud əsaslı virtual həll kimi, ya da xüsusi avadanlıq üzərindən tətbiq oluna bilir. Bu isə müxtəlif tipli donanmalar üçün çevik istifadə imkanı yaradır.
Şirkət bildirir ki, yeni xidmət Beynəlxalq Təsnifat Cəmiyyətləri Assosiasiyasının (IACS) E26 və E27 kiber təhlükəsizlik standartlarına uyğunluğu dəstəkləyir. Bu tələblər 2024-cü ilin iyulundan sonra tikilən və ya müqavilə bağlanan gəmilər üçün məcburidir.
“Navarino”nun Texnologiya direktoru Alex Giouzenis qeyd edib ki, dənizçilikdə rəqəmsallaşma artdıqca kiber təhlükələr də daha mürəkkəb xarakter alır və buna uyğun yeni müdafiə yanaşmaları tələb olunur.
Onun sözlərinə görə, “Ozora” dənizçilik üçün xüsusi hazırlanmış, gəmi operatorlarına əlavə texniki bilik tələb etmədən idarə oluna bilən müasir kiber təhlükəsizlik həllidir.
