“Everllence” yeni ikiyanacaqlı metan mühərriki üçün ilk sifarişini alıb
Norveçin “Global Car Carriers” (GCC) şirkəti Çində inşa olunacaq 8,600 CEU tutumlu dörd avtomobil daşıyıcısı üçün “Everllence” şirkətindən ikiyanacaqlı metan mühərrikləri sifariş edib.
“Seanews.az” xəbər verir ki, Mk10.76S60ME-GI modelli mühərriklər yüksək tutumlu gəmilərdə quraşdırılaraq yanacaq çevikliyi, aşağı sərfiyyat və demək olar ki, sıfıra yaxın metan emissiyası təmin edəcək.
Şirkətlərin açıqlamasına görə, bu mühərriklər gəmi operatorlarına həm ağır yanacaqda, həm də metanla işləmə rejimində səmərəli istismar və yanacaq tədarük strategiyasını optimallaşdırmaq imkanı verəcək.
“Everllence” nümayəndələri bu sifarişi ME-GI mühərrik platformasının Mk10.7 versiyası üzrə ilk kommersiya tətbiqi kimi dəyərləndirib və “dual-fuel” texnologiyasına bazar etimadının davam etdiyini vurğulayıb.
Şirkət həmçinin bildirib ki, ME-GI platforması artıq 1 260-dan çox sifariş və 33 GW-dan artıq güc toplayaraq dəniz sektorunda geniş istifadə olunan ikiyanacaqlı həllərdən birinə çevrilib.
