Gəmilərdə gövdə çirklənməsinə qarşı robot əsaslı texniki xidmət platforması hazırlanır
Cənubi Koreyanın “HD Hyundai” şirkəti boya istehsalçısı “KCC” və sualtı robot texnologiyaları üzrə ixtisaslaşmış “Tass Global” ilə birlikdə gəmi gövdələrinin idarə olunması üçün inteqrasiya olunmuş yeni platforma hazırlayır.
“Seanews.az” xəbər verir ki, “Gəmi gövdəsinə kompleks xidmət həlli” (Total Hull Care Solution) adlı platforma gövdənin yoxlanılması, vəziyyətinin qiymətləndirilməsi, təmizlənməsi və nəticələrin təsdiqini avtomatlaşdıracaq.
Təşəbbüs gəmi gövdəsində yaranan bioloji çirklənmənin, xüsusilə dəniz yosunları və balıqqulağı kimi canlıların yaratdığı çöküntülərin qarşısının alınmasına yönəlib.
Layihə çərçivəsində dalğıclara və ya quru doklara ehtiyac olmadan gövdəni yoxlaya bilən avtonom sualtı robotlar hazırlanacaq. Sistem real vaxt rejimində gövdənin vəziyyətini təhlil edəcək, texniki xidmət ehtiyacını müəyyənləşdirəcək, təmizləmə işlərini həyata keçirəcək və görülən tədbirlərin effektivliyini qiymətləndirəcək.
Şirkətin məlumatına görə, bu layihə gəmiqayırma, örtük texnologiyaları və robot texnikasını vahid gövdə idarəetmə platformasında birləşdirməyə yönəlmiş ilk təşəbbüsdür.
