“Ubotica” dəniz təhlükəsizliyi platformasını genişləndirir
İrlandiyanın kosmik texnologiyalar şirkəti “Ubotica Technologies” süni intellekt əsaslı dəniz təhlükəsizliyi platformasının inkişafı üçün 11 milyon dollar investisiya cəlb etdiyini açıqlayıb.
“Seanews.az” xəbər verir ki, bu vəsait şirkətin “Live Maritime Intelligence” (LMI) adlı platformasının kommersiya tətbiqini sürətləndirməyə yönəldiləcək. Sistem dəniz ərazilərində yaranan təhlükələri real vaxt rejimində aşkarlamaq üçün süni intellekt və peyk texnologiyalarından istifadə edir.
Ənənəvi peyk müşahidə üsullarından fərqli olaraq, LMI potensial riskləri müəyyənləşdirir, uyğun peyk və sensorları həmin əraziyə yönəldir və təhlükəsizlik qurumlarına bir neçə dəqiqə ərzində əməliyyat qərarları üçün lazım olan məlumatları təqdim edir.
“Ubotica”nın texnologiyası artıq orbitdə yüz minlərlə süni intellekt əməliyyatı həyata keçirib, müxtəlif kosmik missiyalar çərçivəsində 30-dan çox Yer müşahidəsi modelini peyklərdə tətbiq edib və bütün missiyalarda uğurlu nəticə əldə edib. “Ubotica” daha əvvəl NASA və Avropa Kosmik Agentliyi ilə də əməkdaşlıq edib.
Şirkətin baş icraçı direktoru Fintan Bakli bildirib ki, yeni investisiya platformanın daha geniş miqyasda bazara çıxarılmasına və dəniz əraziləri ilə kritik dəniz infrastrukturunun qorunmasına kömək edəcək.
