Dənizçilik sənayesi S-100 standartına keçidə hazırlaşır
Dənizçilik sektoru S-100 məlumat çərçivəsinin tətbiqi ilə rəqəmsal naviqasiyada yeni mərhələyə hazırlaşır. Beynəlxalq Hidroqrafiya Təşkilatı (IHO) tərəfindən hazırlanmış bu standart gələcək nəsil rəqəmsal naviqasiya xidmətləri və Elektron Xəritələrin Göstərilməsi və Məlumat Sistemi (ECDIS) üçün əsas platforma olacaq.
“Seanews.az” xəbər verir ki, keçid çərçivəsində hazırda istifadə olunan S-57 elektron naviqasiya xəritəsi standartını mərhələli şəkildə S-101 əvəz edəcək. Bununla yanaşı, dənizçilərə su dərinliyi, su səviyyəsi, axınlar və digər dinamik məlumatları vahid ekranda təqdim edən əlavə məlumat qatları istifadəyə veriləcək.
Sənaye nümayəndələrinin gözləntilərinə görə, S-100-ə uyğun sertifikatlaşdırılmış ECDIS sistemləri 2028-ci ildən bazara çıxarıla bilər. 2029-cu il yanvarın 1-dən etibarən isə yeni quraşdırılan və ya modernləşdirilən bütün ECDIS sistemlərinin S-100 standartını dəstəkləməsi tələb olunacaq.
Yeni standartın praktik tətbiqini qiymətləndirmək məqsədilə Böyük Britaniya Hidroqrafiya İdarəsi və beynəlxalq tərəfdaşlar simulyasiya sınaqları keçirib. Sınaqlarda dənizçilər limanlara giriş-çıxış və keçid əməliyyatlarını yeni S-100 əsaslı ECDIS sistemləri ilə yerinə yetirərək onların funksionallığını qiymətləndiriblər.
Sınaqlar göstərib ki, S-100 müxtəlif mənbələrdən əldə olunan hidroqrafik məlumatların vahid platformada birləşdirilməsi sayəsində situasiya məlumatlılığını artırır, marşrut planlaşdırılmasını təkmilləşdirir və gəmi idarəetməsi zamanı daha əsaslandırılmış qərarlar qəbul edilməsinə imkan yaradır.
Bununla yanaşı, mütəxəssislər yeni sistemlərin tətbiqi üçün dənizçilərin əlavə təlim keçməsinin vacibliyini vurğulayırlar. Qarşıdakı illərdə müxtəlif əməliyyat şəraitində əlavə sınaqların keçirilməsi və əldə olunan nəticələrin bütün dənizçilik ictimaiyyəti ilə paylaşılması planlaşdırılır.
