Pilotsuz suüstü aparat 100 saatdan çox fasiləsiz dəniz əməliyyatı həyata keçirib
“ACUA Ocean” şirkətinin “Mk1 PIONEER” pilotsuz suüstü aparatı (USV) uzaqdan idarə olunmaqla beş günlük dəniz sınağını uğurla başa vurub.
“Seanews.az” xəbər verir ki, sınaq zamanı aparat 100 saatdan artıq fasiləsiz fəaliyyət göstərərək çoxdomenli dəniz əməliyyatları imkanlarını nümayiş etdirib.
Böyük Britaniyanın Plimut şəhərindən yola düşən “PIONEER” sahildən 16–20 dəniz mili məsafədə heç bir fiziki müdaxilə olmadan işləyib. Missiya çərçivəsində eyni vaxtda radiotezlik müşahidə sistemi və çoxşüalı exolot vasitəsilə hidroqrafik ölçmələr həyata keçirilib. Toplanan məlumatları isə real vaxt rejimində müxtəlif əməliyyat mərkəzlərinə ötürülüb.
35°C-dən yüksək temperatur, 2 metrdən çox dalğalar və əlverişsiz hava şəraitinə baxmayaraq, “PIONEER” missiyanı fasiləsiz yerinə yetirib. Sınaq zamanı İngiltərə kanalında dəniz dibinin yüksək dəqiqlikli xəritələşdirilməsi aparılıb, eyni vaxtda çoxsaylı dəniz və hava hədəflərinin radiotezlik müşahidəsi həyata keçirilib, həmçinin təxminən 22 kilometr məsafədən aşağı güclü fövqəladə siqnal mayakının yeri müəyyən edilərək məlumat müvafiq xilasetmə xidmətinə ötürülüb.
Şirkət bildirib ki, 2027-ci ilin ikinci rübündə suya buraxılması planlaşdırılan “Mk2 PIONEER” modeli bir neçə həftə fasiləsiz fəaliyyət göstərə biləcək, 7 tonadək faydalı yük daşıyacaq və daha geniş əməliyyat imkanlarına malik olacaq.
