Busanda dəniz süni intellekt materialları üzrə tədqiqat mərkəzi yaradılacaq
Cənubi Koreyanın Busan şəhər administrasiyası, Pukyonq Milli Universiteti və Koreya Materialşünaslıq İnstitutu (KIMS) dəniz sənayesində rəqəmsal innovasiyaları sürətləndirmək məqsədilə Dəniz Süni İntellekt Materialları Tədqiqat Mərkəzi yaradacaq.
“Seanews.az” xəbər verir ki, mərkəz ənənəvi dənizçilik, balıqçılıq və gəmiqayırma sahələrinə süni intellekt texnologiyalarının tətbiqini təşviq edəcək. Burada gəmi gövdəsinin rənglənməsi üçün robotlaşdırılmış istehsal sistemləri, ağıllı texniki xidmət texnologiyaları, avtonom mobil sistemlər və rəqəmsal əkiz (digital twin) texnologiyaları əsasında avadanlıqların istismar müddətinin proqnozlaşdırılması üzrə layihələr həyata keçiriləcək.
Yeni mərkəz Pukyonq Milli Universitetinin Yonqdanq kampusunda yerləşəcək. İnfrastrukturun yenidən qurulmasının bu ilin oktyabrında başa çatdırılması, mərkəzin isə 2027-ci ildə tam fəaliyyətə başlaması planlaşdırılır.
Layihə çərçivəsində Busan şəhər administrasiyası inzibati dəstək və dövlət maliyyəsinin cəlb olunmasını təmin edəcək, universitet tədqiqat infrastrukturu təqdim edəcək, KIMS isə əsas texnologiyaların hazırlanmasına və genişmiqyaslı elmi-tədqiqat layihələrinə rəhbərlik edəcək.
