Öz enerjisi ilə işləyən dəniz süni intellekt platforması təqdim olunub
Dəniz texnologiyaları şirkəti “Optimal Transit” süni intellekt (AI) məlumat mərkəzləri üçün nəzərdə tutulmuş, öz enerjisini özü istehsal edən dəniz platforması konseptini təqdim edib.
“Seanews.az” xəbər verir ki, “Kraaken” adlı platforma 10 MVt-dan 100 MVt-a qədər dörd standart ölçüdə hazırlanır. O həm daimi olaraq dənizdə lövbərlənə, həm də güclü hava şəraitindən yayınmaq üçün öz hərəkət imkanları hesabına yerini dəyişə bilir.
Şirkətin məlumatına görə, platforma elektrik enerjisini şəbəkədən almaq əvəzinə, okean sularının temperatur fərqindən və məlumat mərkəzlərinin yaratdığı istilikdən istifadə edən rəqəmsal okean istilik (DOT - Digital Ocean Thermal) texnologiyası ilə istehsal edəcək. Bu yanaşma enerji, soyutma suyu və torpaq sahəsinə artan tələbatın yaratdığı problemləri azaltmağa imkan verə bilər.
“Optimal Transit” bildirir ki, 100 MVt gücündə bir “Kraaken” platformasının tikintisi hesablama avadanlığı istisna olmaqla 500 milyon dollardan aşağı başa gələ bilər.
Şirkət 2027-ci ildən etibarən tərəfdaş gəmiqayırma zavodlarında ildə 20-yə qədər 100 MVt gücündə platforma istehsal etməyi planlaşdırır.
Bu konsepsiya gələcəkdə yalnız AI məlumat mərkəzləri üçün deyil, həm də dənizdə enerji istehsalı, rabitə və duzsuzlaşdırma kimi sahələrdə istifadə üçün nəzərdə tutulur.
