Maye hidrogen tankeri - yüngül qazın itkisini minimuma endirəcək yeni texnologiya
Cənubi Koreyanın “Korea Shipbuilding & Offshore Engineering” (“KSOE”) şirkətinin mütəxəssisləri uzunmüddətli dəniz daşımaları zamanı ultra yüngül qazın itkisini minimuma endirəcək yeni texnologiya hazırlayıblar.
“Seanews.az” xəbər verir ki, texnologiya böyük həcmdə daşıma zamanı hidrogenin həddindən artıq buxarlanmasının qarşısını alacaq və “yaşıl yanacağın” tankerlərlə ən azı boru kəmərləri ilə nəqletmədən daha səmərəli daşınmasını təmin edəcək.
Şirkət 2025-ci ildə ilk maye hidrogen tankerini tikib istismara verməyi planlaşdırır. Gəminin çənlərinin tutumu 20 min kubmetr təşkil edəcək.
2030-40-cı illərdə Cənubi Koreya bu tutumda 20-yə yaxın tanker tikməyi planlaşdırır. "Yaşıl yanacağa" tələbatın sonrakı dinamik artımı halında, gəmi inşaatçıları öz hidrogen parkını 170 min kubmetr qaz tutumu olan daha böyük gəmilərlə genişləndirməyi planlaşdırırlar.
Mütəxəssislər vurğulayırlar ki, "hidrogen" tankerləri mayeləşdirilmiş təbii qazdan əvvəlcə yanacaq kimi istifadə edəcək və yalnız sonradan hidrogen yanacağına keçəcəklər.
