500 ilə qədər yaşayan köpək balıqları ürək xəstəliklərinə dərman ola bilərmi?
Qrenlandiya köpək balıqlarının uzun ömür sürməsi ilə bağlı yeni tapıntılar əldə edilib.
AZƏRTAC “The İndependent” nəşrinə istinadla xəbər verir ki, Qrenlandiya köpək balığı yetkinliyə təxminən 150 yaşında çatır. Ən uzunömürlü onurğalı olan Qrenlandiya köpək balığının necə sağ qaldığına dair yeni tapıntılar aşkarlanıb.
Tədqiqatçılar yeni kəşfin insanların ürək sağlamlığını yaxşılaşdıra biləcək tədqiqatlara əhəmiyyətli töhfələr verəcəyini gözləyirlər. Orta ömrü 270-500 il arasında dəyişən Qrenlandiya köpək balığı Şimali Atlantika və Antarktika okeanlarında yaşayır. Lakin bu heyvanların bu qədər uzun müddət necə yaşadığı sirr olaraq qalır.
Araşdırma nəticəsində məlum olub ki, Qrenlandiya köpək balığı əzələlərinin unikal metabolizması sayəsində uzun müddət yaşaya bilər. Tədqiqatçılar Qrenlandiya köpək balıqlarının əzələ toxuması nümunələrində 5 fərqli fermenti araşdırıblar. Müxtəlif yaşlarda və temperaturlarda bu fermentlərin metabolik aktivliyinin necə dəyişdiyi təhlil edilib. Alimlər mətbuat şərhlərində heyvanların əzələ metabolizmində yaşa bağlı dəyişiklik olmadığını aşkarladıqlarını söyləyiblər. Tədqiqata rəhbərlik edən Evan Camplisson bildirib ki, bu, yaşlandıqca metabolik ferment aktivliyində müəyyən dəyişiklik göstərən əksər heyvanlardan tamamilə fərqlidir. Nəticələr fərziyyəmizi dəstəkləyir ki, Qrenlandiya köpək balığı digər heyvanlar kimi klassik yaşlanma əlamətlərini göstərmir. Gələcək tədqiqatlar maddələr mübadiləsinin köpək balıqlarının uzunömürlülüyündə nə dərəcədə rol oynadığını göstərəcək. Alimlər hüceyrə səviyyəsində insan ürəyinə bənzəyən köpək balığının ürəyinin araşdırılmasının insan sağlamlığı üçün mühüm nəticələr verəcəyinə ümid edirlər. Qrenlandiya köpək balıqlarının ürək-damar xəstəliklərindən ciddi şəkildə təsirlənmədən bu qədər uzun müddət yaşamasına imkan verən uyğunlaşmaları anlaya bilsək, ürək sağlamlığını yaxşılaşdırmaq üçün bunların bəzilərini insanlara uyğunlaşdıra bilərik. Bunlar yaşlandıqca daha çox yayılmış və ağırlaşan problemlərdir”.
Tədqiqatçılar, həmçinin qeyd ediblər ki, temperaturun artması Qrenlandiya köpək balıqlarının maddələr mübadiləsində ciddi dəyişikliklərə səbəb olub. Bu səbəbdən onlar bu növün yaşayış mühitinin iqlim böhranı ilə təhlükə altına düşəcəyindən narahatdırlar. Evan Camplisson diqqətə çatdırıb ki, okeanların istiləşməsi bu növ üçün böyük problemlər yaradacaq: “Bu vəziyyət çox güman ki, Qrenlandiya köpək balıqlarının soyuq sularda qalmaq üçün getdikcə daha daralmış coğrafi əraziyə sıxışdırılması ilə nəticələnəcək”.
