TTM-də keçirilən DPVM üzrə ilk kurs, sözügedən kurs üzrə “Təlimatçı hazırlığı” təlimi və “Təlimatçıların qiymətləndirilməsi” prosesi başa çatıb
ASCO-nun Təlim Tədris Mərkəzində mexaniklər, elektrik-mexaniklər və mühəndis-mexaniklər üçün “Dinamik mövqe saxlama sisteminə texniki xidmət” (DPVM) təlimi üzrə ilk kurs, eləcə də “Təlimatçı hazırlığı” təlimi və “Təlimatçıların qiymətləndirilməsi” prosesi yekunlaşıb.
Hər iki təlim Beynəlxalq Nautical Dənizçilik İnstitutunda komitə sədri, Dinamik Mövqe Saxlama kurslarının yaradılmasında və təkmilləşdirilməsində əhəmiyyətli rol oynayan və bu kurs üzrə mərkəzlərin yaradılmasında uzunmüddətli təcrübəyə sahib olan Dr. Surender Kumar tərəfindən keçirilib.
Kursların yekununda həm “Təlimatçı hazırlığı” təlimi və “Təlimatçıların qiymətləndirilməsi” prosesini uğurla bitirmiş təlimatçılar, həm də “Dinamik mövqe saxlama sisteminə texniki xidmət” təlimində iştirak edən dinləyicilər Dənizçilik İnstitutunun keçirdiyi imtahanda müvəffəqiyyət qazanaraq NI akkreditasiyalı sertifikatla təltif olunublar.
Qeyd edək ki, Dr. Surender Kumar Azərbaycanda olduğu müddətdə Azərbaycan Dövlət Dəniz Akademiyasında təhsil alan hindistanlı tələbələrlə də görüşüb. Görüş zamanı naviqasiya mühəndisliyində və gəmi sürücülüyündə tələbələrin qarşılaşacağı çətinliklər, bu çətinliklərin aradan qaldırılma üsulları və dənizçilik sahəsindəki yeniliklər barədə müzakirələr aparılıb.
Onu da xatırladaq ki, ASCO-nun Təlim Tədris Mərkəzi dünyada DP təlimlərinin keçirilməsinə səlahiyyəti olan 83 mərkəzdən biri, Azərbaycanda isə yeganə mərkəzdir.
