“Dalğalar yaratmaq: Dənizçilik biznesinizi dəyişəcək PR strategiyaları” adlı kitab işıq üzü görüb
“Polaris Media” şirkətinin təsisçisi Ben Pinnikton “Splash” nəşri üçün yazdığı məqaləsində dənizçilik sektorunun beynəlxalq mediada getdikcə daha çox diqqət mərkəzinə çevrildiyini və bunun sənaye üçün ciddi imic sınağı yaratdığını bildirib.
"Seanews.az" xəbər verir ki, onun yeni kitabı — “Making Waves: PR strategies to transform your maritime business” (“Dalğalar yaratmaq: Dənizçilik biznesinizi dəyişəcək PR strategiyaları”) 4 noyabrda Amazon platformasında “Rethink Press” nəşriyyatı tərəfindən satışa çıxarılacaq.
Pinniktonun fikrincə, dənizçilik sektoru onilliklər boyu öz ictimaiyyətlə əlaqələrinə ciddi yanaşmayıb və indi bunun nəticələri ilə üz-üzədir.
Pinnikton vurğulayıb ki, şirkətlər özlərini “görünməz” saxlaya bilməzlər. Əgər sən yaxşı davranış və şəffaflıq üzərindən reputasiya qurmasan, böhran zamanı media sənə xeyirxahlıq etməyəcək. “Bu, dənizçilik üçün böyük bir PR çağırışıdır. Sektor özü haqqında danışmasa, yaranan boşluğu neqativ xəbərlər və yanlış məlumatlar dolduracaq”, – deyə o qeyd edib.
Müəllif hesab edir ki, dənizçilik artıq əsas auditoriyaya “emissiya Everesti”ni izah etməli, yəni sənayenin tam karbonsuzlaşmasının təxminən 1,9 trilyon dollara başa gələcəyini və 120 min at gücünə malik nəhəng gəmiləri alternativ yanacaqla işlətməyin çətinliyini anlatmalıdır. Əks halda, ictimai imic böhranı daha da dərinləşə bilər.
“IMO-da baş verən bütün çətinliklərə baxmayaraq, bu, inanılmaz səylərdir və artıq təkcə dənizçilik mediasında deyil, əsas və sosial mediada da nümayiş etdirilməlidir. IMO ətrafında yaranan böhran fonunda belə bir kommunikasiya kampaniyası indi hər zamankından daha çox vacibdir,” – deyə Ben Pinnikton qeyd edib.
