ADDA tələbələrinin diplomqabağı istehsalat təcrübəsi davam edir
“Azərbaycan Xəzər Dəniz Gəmiçiliyi” QSC-nin (ASCO) Azərbaycan Dövlət Dəniz Akademiyasının (ADDA) "Gəmiqayırma və gəmi təmiri mühəndisliyi" ixtisasının 4-cü tədris ilində təhsil alan tələbələrinin Bakı Gəmiqayırma Zavodunda diplomqabağı istehsalat təcrübəsi davam edir. Hazırda Zavodda 21 tələbə təcrübə keçir.
Təcrübənin fəaliyyət planını Zavodun Təlim-Tədris Mərkəzi ADDA-nın “Gəmiqayırma və gəmi təmiri” kafedrası ilə razılaşdırılmış formada hazırlayıb. Planda keyfiyyətli tədrisin təşkili və istehsalatda yeni tələblərin yerinə yetirilməsi istiqamətində məqsədyönlü inkişaf məsələləri nəzərə alınıb.
Təcrübə zamanı tələbələr gəmiqayırma sahəsinə aid spesifik və xüsusi planlaşdırılmış təlimlərdə nəzəri və praktiki iştirak imkanı əldə edəcəklər. Həmçinin, onlar üçün bu sahənin mütəxəssisləri ilə görüşlər təşkil ediləcək və tələbələr peşəkarların təcrübəsindən yararlana biləcəklər. Təcrübədə fərqlənən tələbələrə sertifikat və həvəsləndirici mükafatlar da veriləcək.
Qeyd edək ki, ADDA-nın “Gəmiqayırma və gəmi təmiri mühəndisliyi” ixtisasının 4-cü tədris ilində təhsil alan daha 8 tələbəsi ASCO-nun “Xəzərdənizlayihə” Elmi Tədqiqat İnstitutunda diplomqabağı istehsalat təcrübəsindədirlər.
