42 yeni yük daşıyıcısı “COSCO”-ya 2 milyard dollara başa gələcək
“COSCO Shipping Development” (“COSCO” qrupunun maliyyə bölməsi, Şanxay, Çin) 42 yeni balker üçün investisiya, gəmiqayırma və lizinq müqaviləsi imzalayıb.
Bu barədə qrupun mətbuat xidməti məlumat yayıb.
Sənədə əsasən, törəmə “COSCO Shipping Heavy Industry” şirkəti 20 gəminin, “CSSC Chengxi” şirkəti isə 22 gəminin tikintisinə sərmayə qoyacaq. Hər birinin dedveyti 64 min ton olan 5 quru yük gəmisi, hər birinin dedveyti 82 min ton olan 2 gəmi və hər birinin dedveyti 80 min ton olan 35 gəmi tikiləcək.
Müqavilənin ümumi dəyəri 14,3 milyard yuandan (təxminən 2 milyard dollar) çoxdur.
Gəmilər 2026-2027-ci illərdə uzunmüddətli çarter müqaviləsi ilə “COSCO Shipping Bulk” balker donanmasının operatoruna veriləcək. Bütün yükdaşıyanlar enerjiyə qənaət edən və ekoloji cəhətdən təmiz texnologiyalarla təchiz olunacaq. Bu gəmilərin bəziləri metanolla işləyə biləcək.
Hazırda “COSCO Shipping Development” 140-dan çox gəmiyə sahibdir. Yeni müqavilə sayəsində “COSCO Shipping Development”-in ekoloji cəhətdən təmiz gəmilərinin sayı əhəmiyyətli dərəcədə artacaq.
Cari ilin əvvəlində “COSCO Shipping”-in ümumi donanması 1325 gəmidən ibarət idi və bu, onu dünyanın ən iri şirkətlərindən birinə çevirdi. Qrupun konteyner donanmasının tutumu 3,08 milyon TEU təşkil edir ki, bu da dünyada dördüncü konteyner donanması deməkdir.
“Seanews.az”
