Azərbaycan Dövlət Dəniz Akademiyasında İİV/QİÇS mövzusunda maarifləndirmə tədbiri keçirilib
Səhiyyə Nazirliyinin Respublika QİÇS-lə Mübarizə Mərkəzi “Azərbaycanda Avropa İİV-ə Testləşmə Həftəsi” və “1 dekabr – Ümumdünya QİÇS-lə Mübarizə Günü” çərçivəsində Azərbaycan Dövlət Dəniz Akademiyasında maarifləndirmə tədbiri keçirib.
Tədbirin məqsədi İmmunitet Çatışmazlığı Virusunun erkən aşkar edilməsinə diqqəti artırmaq, əhalinin İİV/QİÇS barədə məlumatlılığını yüksəltmək, həmçinin sağlam və təhlükəsiz həyat tərzinin təbliğinə dəstək vermək olub.
Təcrübəli həkimlərin iştirakı ilə keçirilən görüşdə tələbələrə İİV/QİÇS-in profilaktikası, xəstəliyin tarixi, yoluxma yolları, müayinə və müalicə imkanları haqqında geniş məlumat verilib. Mütəxəssislər tələbələrin ünvanladıqları sualları cavablandırıblar.
Sonda iştirakçılara İİV/QİÇS mövzusunda maarifləndirici broşür və bukletlər təqdim olunub, xəbərdaredici məlumatlar çatdırılıb.
