Gələcəyin gəmiləri daha ağıllı, daha təhlükəsiz və daha ekoloji olacaq
Rəqəmsallaşma və süni intellekt dənizçilik sektorunda təhlükəsiz, ağıllı və ətraf mühitə həssas əməliyyatlar üçün yeni imkanlar yaradır.
Lakin alternativ yanacaqlar üzrə dəqiq yol xəritəsinin olmaması və rabitə infrastrukturundakı çatışmazlıqlar irəliləyişin qarşısında əsas maneələrdən biri kimi qalır.
Rabitə məhdudiyyətləri və “bant genişliyi” problemi
LEO peykləri (Yerə yaxın orbitdə yerləşən rabitə peykləri) dənizdə əlaqəni yaxşılaşdırsa da, bir çox regionda gəmilər hələ də “bant genişliyi”nin (yəni rabitə kanalının eyni anda ötürə biləcəyi məlumat həcminin) məhdud olması səbəbindən yüksək həcmli tətbiqlərlə işləyə bilmir.
Bu, performansın zəifləməsinə gətirib çıxarır və şirkətləri “hibrid şəbəkə” sistemlərinə (bir neçə müxtəlif rabitə kanalının birləşdirilməsi ilə yaradılan sistemlər) yönəlməyə məcbur edir. Mütəxəssislər bildirirlər ki, həm əməliyyat tələblərini, həm də heyətin gündəlik ehtiyaclarını qarşılamaq üçün rabitənin düzgün idarə edilməsi kritik əhəmiyyət daşıyır.
Bazarın doluluğu və seçim çətinliyi
Proqnozlara görə, 2031-ci ilə qədər dənizçilikdə rəqəmsallaşmanın bazar dəyəri 368 milyard dolları ötəcək. Lakin bazarda çoxlu sayda oxşar texnoloji həllin mövcudluğu gəmi sahiblərinin real faydanı marketinqdən (reklam və təqdimat iddialarından) ayırmasını çətinləşdirir.
Tam sınaqdan keçirilməmiş və inteqrasiyası zəif olan sistemlər isə miqyaslama problemlərinə (yəni sistemin daha çox gəmi və ya daha böyük əməliyyat yükü altında da eyni effektivliklə işləyə bilməməsi) səbəb ola bilər
Praktik yanaşma zərurəti
Mütəxəssislər hesab edirlər ki, texnoloji irəliləyiş sadəcə yeni vasitələr əlavə etməklə deyil, həm də bir-biri ilə uyğun, miqyaslana bilən (böyüdükcə də işləməyə davam edən) və əməliyyat səmərəliliyini artıran ekosistemlərin qurulması ilə mümkündür.
Beləliklə, tam inteqrasiya olunmuş gəmilərin dayanıqlı, təhlükəsiz və iqtisadi cəhətdən sərfəli əməliyyatlar həyata keçirdiyi gələcək mümkün ola bilər.
Nicat Osmanov
