LNG gəmiçiliyin enerji keçidində əsas yanacaq kimi göstərilir
Gəmiçilik sektorunda enerji keçidi artıq gələcək plan deyil, real prosesə çevrilib və bu mərhələdə mayeləşdirilmiş təbii qazın (LNG) əsas alternativ yanacaq kimi rolu artır.
“Seanews.az” xəbər verir ki, bu barədə “Sea-LNG” təşkilatının sədri Piter Kellerin məqaləsində qeyd olunub.
Məlumata görə, 2025-ci ildə sifariş edilən alternativ yanacaqlı gəmilərin 79 faizi LNG ilə işləyən gəmilər olub. Hazırda istismarda və sifarişdə olan LNG ilə işləyən gəmilər, o cümlədən LNG daşıyıcıları, ümumi dünya donanmasının yükdaşıma qabiliyyətinin təxminən 10 faizini təşkil edir.
Məqalədə qeyd edilir ki, LNG enerji sıxlığı, mövcudluğu və normativ tələblərə uyğunluq baxımından digər alternativ yanacaqlarla müqayisədə üstünlüklərə malikdir. Bundan əlavə, sektor LNG-dən biometan və sintetik metan kimi daha təmiz yanacaqlara keçidi mümkün edən mərhələli model üzərində işləyir.
Beynəlxalq Enerji Agentliyinin məlumatına görə, biometan istehsalı sürətlə artır və bu resurs qlobal enerji keçidində hələ tam istifadə olunmayan böyük potensiala malikdir. Artıq Avropa, Şimali Amerika və Asiyada bir sıra gəmiçilik şirkətləri mayeləşdirilmiş biometanı yanacaq qarışığında istifadə etməyə başlayıb.
Ekspertlər bildirirlər ki, LNG və onun bərpa olunan variantları istifadədə olduqda kükürd və azot oksidlərinin emissiyası kəskin azalır, hissəcik tullantıları isə demək olar ki, tam aradan qalxır. Sənaye nümayəndələri hesab edirlər ki, LNG yaxın illərdə gəmiçiliyin dekarbonizasiya prosesində əsas keçid yanacaqlarından biri olacaq.
