Hörmüz boğazında tankerə hücum edilib, gəmidə yanğın baş verib
Hörmüz boğazında kommersiya gəmilərinə hücumlar oktyabrın ilk günündə də davam edib. Tankerlərdən birinin naməlum mərmi ilə vurulduğu və nəticədə gəmidə yanğın baş verdiyi bildirilir.
“Seanews.az” bu barədə xarici mediaya istinadla xəbər verir.
Böyük Britaniyanın Dəniz Ticarət Əməliyyatları İdarəsi (UKMTO) oktyabrın 1-də yerli vaxtla 17:50-də tankerin boğazdan keçərkən naməlum mərmi ilə vurulması barədə üçüncü tərəfdən məlumat aldığını açıqlayıb. Ekipaj üzvlərinin hamısının təhlükəsiz olduğu, ətraf mühitə dəymiş zərərin isə hələlik məlum olmadığı qeyd edilib.
Məlumata görə, sentyabr ayında Hörmüz boğazında əsasən tankerlərə qarşı ən azı 16 hücum qeydə alınıb. Sentyabrın 28-29-da isə 24 saat ərzində dörd belə hadisə baş verib.
Birgə Dəniz Məlumat Mərkəzinin (JMIC) məlumatına görə, boğazda pilotsuz uçuş aparatlarının uçuşları, ticarət gəmilərinin müşahidəsi və radio vasitəsilə əlaqə yaratmaq cəhdləri davam edir.
Bu arada, boğazdan keçən gəmilərin real sayı ilə bağlı fərqli məlumatlar var. Bir çox gəmi hücum riskini azaltmaq üçün AIS transponderlərini söndürdüyündən, müstəqil izləmə məlumatları hər iki istiqamətdə gündəlik keçidlərin birrəqəmli sayda olduğunu göstərir. ABŞ-nin məlumatlarına görə isə son 96 saat ərzində sutkada orta hesabla 30 gəmi boğazdan keçib.
Hücumlar və təhlükəsizlik riskləri səbəbindən Hörmüz boğazından keçmək istəyən gəmi sahiblərinin sayı məhdud olaraq qalır. Nəticədə VLCC tankerlərinin boğazdan keçid tarifləri sutkada 1 milyon dollardan yuxarı qalxıb.
