“SHI” 2024-cü ilin əvvəlindən 18 gəminin inşası üçün sifarişlər alıb
Sifarişlərin sayına görə dünyanın üçüncü ən böyük gəmiqayırma şirkəti olan Cənubi Koreyanın “Samsung Heavy Industries” (“SHI”, “Samsung Group”-a daxildir) neftin dənizdəki yataqlardan quruda yerləşən neftayırma zavodlarına daşıyacaq tankerin tikintisi üçün 198,8 milyard von (təxminən 150 milyon dollar) dəyərində müqavilə imzalayıb.
“Seanews.az” bu barədə “Yonhap” agentliynə istinadən xəbər verir.
Gəmini sifariş edən şirkətin adı açıqlanmır. Tankerin sifarişçiyə təhvil verilməsi 2026-cı ilin avqust ayının sonuna planlaşdırılır.
2024-cü ilin əvvəlindən Cənubi Koreya tərsanəsi 3,8 milyard dollar dəyərində 18 gəminin inşası üçün sifarişlər alıb ki, bu da bu il üçün nəzərdə tutulan 9,7 milyard dolların 39%-ni təşkil edir. Sifariş edilən gəmilər arasında: mayeləşdirilmiş təbii qazın daşınması üçün 15 tanker (LNG), iki VLAC ammonyak tankeri və bir servis tankeri var.
1974-cü ildə yaradılmış “Samsung Heavy Industries” (“SHI”, baş ofisi Seulda yerləşir) dünyanın ən böyük gəmiqayırma şirkətlərindən biridir və Cənubi Koreyadakı “Böyük üçlük” gəmiqayırma şirkətlərinin liderlərindən biridir. Şirkət müxtəlif növ gəmilərin, dənizdə üzən kranların, portal kranların, gəmilər üçün rəqəmsal avadanlıqların tikintisi ilə məşğuldur.
