Bu il tanker utilizasiyası üzrə sövdələşmələrin 58%-ni sanksiyaya məruz qalan gəmilər təşkil edir
“Clarksons Research”in məlumatına görə, 2026-cı ildə indiyədək 26 sanksiyaya məruz qalan gəmi utilizasiya üçün satılıb. Onlardan 22-si tankerdir və bu göstərici il ərzində utilizasiya üçün satılan bütün tankerlərin 58%-ni təşkil edir.
“Seanews.az” xəbər verir ki, bu məlumatlar sanksiyaların tətbiqinin utilizasiya bazarına təsirini artırdığını göstərir. Xüsusilə köhnəlmiş “kölgə donanması”na məxsus gəmilər bayraq və ya sahib dəyişdirməklə fəaliyyətlərini davam etdirmək əvəzinə dövriyyədən çıxarılır.
Bununla belə, ümumilikdə gəmi utilizasiyası tarixi minimumlara yaxın olaraq qalır. “Clarksons Research”in hesabatına əsasən, 2026-cı ildə indiyədək cəmi 6,4 milyon dwt gəmi utilizasiya üçün satılıb ki, bu da ötən illərin aşağı göstəriciləri ilə eyni səviyyədədir və 2025-ci illə müqayisədə 14% azdır.
Bu il utilizasiya edilənlər arasında 2,7 milyon dwt tanker və 2,1 milyon dwt quru yük gəmisi var. Konteyner gəmilərinin utilizasiyası isə təxminən 25 min TEU təşkil edib.
Qərb ölkələrinin sanksiya siyahısında olan gəmiləri tamamilə dövriyyədən çıxarmaq səyləri də güclənir. ABŞ-nin sanksiyaları pozduğu üçün müsadirə etdiyi tankerlərin utilizasiyaya yönəldildiyi, “GMS” şirkətinin isə dörd sanksiyalı gəminin utilizasiyası üçün ABŞ Maliyyə Nazirliyindən lisenziya aldığı bildirilir. “GMS” hesab edir ki, effektiv lisenziyalaşdırma mexanizmi hər il 100-dən çox “kölgə donanması” gəmisinin dövriyyədən çıxarılmasına imkan verə bilər.
