Böyük Britaniya yeni sanksiya paketi ilə səkkiz Rusiya gəmisini hədəfə alıb
Böyük Britaniya Rusiyanın enerji gəlirlərinə, dəniz logistikasına və Moskvanın Ukraynadakı müharibəsini dəstəklədiyi bildirilən şəxslərə qarşı yeni sanksiyalar tətbiq edib.
“Seanews.az” bu barədə xarici mediaya istinadla xəbər verir.
Oktyabrın 1-də açıqlanan paket çərçivəsində 23 fiziki və hüquqi şəxs, həmçinin səkkiz gəmi sanksiyalara məruz qalıb. Gəmilər arasında Rusiyanın “kölgə” donanmasına aid olduğu bildirilən üç gəmi, bunkerləmə xidməti göstərən iki gəmi və Rusiyaya məxsus üç buz sinifli gəmi var.
Sanksiya tətbiq edilən gəmilərdən beşi LNG daşıyıcısıdır. Onların arasında Rusiyanın Arktikada LNG daşımalarını dəstəkləmək üçün nəzərdə tutulan üç yeni Arc7 buz sinifli gəmi – “Chaivo”, “Portovyy” və “Aleksey Kosygin” də yer alır.
London həmçinin 2027-ci il yanvarın 1-dən Rusiyanın LNG ixracına xidmət göstərən dəniz nəqliyyatı və əlaqəli xidmətlərə tətbiq olunan məhdudiyyətləri genişləndirməyə hazırlaşır. Bununla yanaşı, Yaponiya və Cənubi Koreyaya Rusiyanın LNG tədarükünə keçid dövründə müəyyən istisnalar tətbiq edilib.
Böyük Britaniya indiyədək Rusiyanın enerji resurslarının Qərbin məhdudiyyətlərindən yan keçməklə daşınması ilə əlaqəli təxminən 600 tankerə sanksiya tətbiq etdiyini açıqlayıb.
