Avropa kosmik yüklərinin daşınması üçün hibrid ro-ro gəmisi sifariş edilib
Fransanın “Sogestran” qrupuna daxil olan “Compagnie Maritime Nantaise” şirkəti Çinin “Guangzhou Shipyard International” gəmiqayırma zavoduna yeni hibrid ro-ro gəmisinin inşası üçün sifariş verib. Gəminin 2030-cu ildə təhvil verilməsi planlaşdırılır.
“Seanews.az” xəbər verir ki, gəmi əsasən Avropa kosmik sənayesinə xidmət göstərərək peyklərin, daşıyıcı raketlərin və digər kosmik texnologiya yüklərinin daşınmasında istifadə olunacaq. Layihəni Fransanın VPLP gəmi layihələndirmə şirkəti hazırlayacaq.
Gəmidə ro-ro göyərtəsi, kosmik yüklər üçün temperatur və digər şəraitin nəzarətdə saxlanıldığı xüsusi bölmə, həmçinin modul açıq göyərtə olacaq.
Gəminin hərəkət sistemi mexaniki mühərriklə yanaşı, üç avtomatlaşdırılmış “OceanWings” sərt yelkənindən ibarət küləkdən yardımçı hərəkət sistemi ilə təchiz ediləcək. Səmərəliliyin artırılması üçün gövdənin optimallaşdırılması, meteoroloji marşrut planlaşdırılması, sistemlərin avtomatlaşdırılması və bioyanacaqdan istifadə də nəzərdə tutulur.
