Gəmiqayırma üçün idxal olunan mallar daha 5 il gömrük rüsumu və ƏDV-dən azad edilib
Qaradağ Sənaye Parkında gəmiqayırma fəaliyyəti ilə məşğul olan sənaye parkının rezidenti tərəfindən İqtisadiyyat Nazirliyinin təsdiqedici sənədi əsasında həmin fəaliyyətin məqsədləri üçün bütün növ malların idxalı daha 5 il gömrük rüsumlarından azad edilir.
APA-nın məlumatına görə, bu, Milli Məclisin bu gün keçirilən iclasında müzakirəyə çıxarılan “Gömrük tarifi haqqında” qanuna və Vergi Məcəlləsinə təklif edilən dəyişiklikdə əksini tapıb.
“Gömrük tarifi haqqında” qanuna əsasən, sənaye parkında (Azərbaycan Respublikası Prezidentinin 2015-ci il 3 iyun tarixli 1255 nömrəli Sərəncamına əsasən yaradılmış Qaradağ Sənaye Parkı nəzərdə tutulur) gəmiqayırma fəaliyyəti ilə məşğul olan sənaye parkının rezidenti tərəfindən İqtisadiyyat Nazirliyinin təsdiqedici sənədi əsasında həmin fəaliyyətin məqsədləri üçün bütün növ malların idxalı 2016-cı il mayın 1-dən 5 il müddətinə gömrük rüsumlarından azad edilib. Təklif olunan qanun layihəsi həmin müddətin cari ildə bitməsini nəzərə alaraq və bu sahədə fəaliyyətin dəstəklənməsinin davam etdirilməsi məqsədilə rüsumlardan azadolmanın daha beş il müddətinə uzadılmasını nəzərdə tutur.
Vergi Məcəlləsinə təklif edilən dəyişikliyə əsasən isə, gəmiqayırma fəaliyyəti ilə məşğul olan sənaye parkının rezidenti İqtisadiyyat Nazirliyinin təsdiqedici sənədi əsasında həmin fəaliyyətin məqsədləri üçün malların idxalı daha 5 il müddətinə əlavə dəyər vergisindən (ƏDV) tutulmasından azad edilir.
Qanun layihələri səsə qoyularaq qəbul edilib.
