Türkiyədə gəmi tikintisi və təmiri üzrə yeni qaydalar qüvvəyə minib
Türkiyə Nəqliyyat və İnfrastruktur Nazirliyi tərəfindən hazırlanmış “Gəmi və Su Nəqliyyat Vasitələrinin Tikintisi, Yenidənqurulması və Texniki Baxım-Təmir Qaydaları” qüvvəyə minib.
"Seanews.az" xəbər verir ki, yeni qaydalar gəmilərin və su nəqliyyat vasitələrinin tikintisi, yenidənqurulması və texniki baxım-təmir proseslərində tətbiq olunacaq texniki tələbləri, nəzarət mexanizmlərini və sənədləşmə prosedurlarını yenidən müəyyən edir.
Əhatə dairəsi və istisnalar
Yeni tənzimləməyə əsasən Türkiyə ərazisində və azad iqtisadi zonalarda tikiləcək, yenidən qurulacaq və ya texniki baxımdan təmir ediləcək bütün gəmilər və su nəqliyyat vasitələri qaydaların əhatə dairəsinə daxil edilib.
Hərbi gəmilər və su nəqliyyat vasitələri, eləcə də Sahil Mühafizəsi Komandanlığı, Jandarma Baş Komandanlığı, Daxili İşlər Nazirliyi və Nəqliyyat və İnfrastruktur Nazirliyinin Tərsanələr və Sahil Qurğuları Baş İdarəsinin uyğun hesab etdiyi digər dövlət qurumlarına məxsus vasitələr istisna təşkil edir.
İcazə prosesi və texniki tələblər
Türk bayraqlı tikinti və ya yenidənqurmadan sonra tam uzunluğu 12 metr və daha çox olan, 12 nəfərdən artıq sərnişin daşıyan və ya təhlükəli yüklərin daşınması ilə məşğul olan gəmilər və su nəqliyyat vasitələri üçün liman idarəsindən rəsmi icazə alınması məcburi edilib.
Tutum artımı nəticəsində sərnişin sayı 12-ni aşan vasitələr də bu kateqoriyaya daxil edilir.
Qeydiyyat məcburiyyəti
Tam uzunluğu 2,5 metr və daha çox olan bütün gəmilər və su nəqliyyat vasitələrinin tikinti və yenidənqurma məlumatları "Turgut Reis" Gəmi Sənayesi Verilənlər Bazası Proqramına (GSVP) tam və dəqiq şəkildə daxil edilməlidir.
Bu tələb xarici bayraqlı gəmilərə də şamil olunur.
Xidmət və yoxlamaların aparıldığı yerlər
Daxili sular istisna olmaqla, tam uzunluğu 15 metr və daha çox olan gəmilər və su nəqliyyat vasitələri üçün quruda aparılan xidməti yoxlamaları yalnız tərsanələrdə, balıqçı limanlarında və ya yaxta limanlarında həyata keçirilə bilər.
Azad iqtisadi zonalarda aparılan əməliyyatlar müvafiq Azad Zona Müdirliklərinin koordinasiyası ilə icra olunacaq.
Qaydaların tələblərinə əməl edilmədiyi hallarda tətbiq ediləcək inzibati cərimələr və digər sanksiyalar dəqiq şəkildə müəyyən olunub.
Yeni qaydaların bir hissəsi dərhal, digər maddələri isə 3 ay sonra qüvvəyə minəcək.
