Gəmilər hakerlərin hədəfində: Kiberhücumlar bir ildə iki dəfədən çox artdı!
Yeni dərc olunmuş "Dənizçilikdə Kiber Təhlükələr" hesabatı, gəmilərin operativ texnologiyalarını (OT) hədəf alan hücumların kəskin artması barədə xəbərdarlıq edir. 2024 və 2025-ci illərin insidentlərinin təhlili göstərir ki, informasiya texnologiyaları (İT) ilə OT arasındakı interfeysləri hədəf alan təhdidlərdə illik 103% artım qeydə alınıb.
“Seanews.az” xəbər verir ki, Koreyanın CYTUR şirkətinin "2026-cı il Dəniz Kiber Təhlükə Hesabatı", təchizat zənciri hücumlarının və aktivlərin saxtalaşdırılmasının artmasını xüsusi vurğulayır. Bu növ hücumlarda hakerlər gəmidaxili proqram təminatındakı boşluqlardan istifadə edərək, eyni vaxtda bir neçə gəmini iflic edə bilirlər.
Şirkət qeyd edir ki, yüksək sürətli peyk rabitə sistemlərinin sürətlə tətbiqi hücum sahəsini genişləndirib. Bu, təcavüzkarlara gəmilərə saxta komandalar ötürmək və ya gəmi məlumatlarını manipulyasiya etmək üçün daha geniş imkanlar yaradır.
Hesabatda qeyd olunur ki, 2026-cı il dəniz kiber təhlükəsizliyinin təkamülündə həlledici il olacaq. Belə ki, Beynəlxalq Təsnifat Cəmiyyətləri Assosiasiyasının (IACS) UR E26 və UR E27 qaydaları qüvvəyə mindikdən sonra müqaviləsi imzalanmış gəmilərin təhvil verilməsinə başlanılır. Dəniz sınaqları zamanı bu kiber təhlükəsizlik standartlarına cavab verməmək, gəminin sifarişçiyə təhvil verilməsini qeyri-mümkün edə bilər.
