"Cefor": Mexaniki zədələr və yanğınlar sığorta ödənişlərinin artmasına səbəb olur
Skandinaviya Dəniz Sığortaçıları Assosiasiyasının (Cefor) hesabatına görə, mexaniki zədələr və yanğınlar dəniz sığortası bazarında ödəniş xərclərinin artmasına səbəb olan əsas amillər olaraq qalır. 2025-ci il ardıcıl üçüncü ildir ki, 10 milyon dollardan yuxarı sığorta tələblərində artım qeydə alınır.
“Seanews.az” xəbər verir ki, xüsusilə yüksək dəyərli gəmilərin tam itirilməsi hallarının çoxalması diqqət çəkir və bu tarixi göstəricilərlə müqayisədə qeyri-adi tendensiya sayılır. 2024 və 2025-ci illərdə hər gəmi üzrə sığorta xərcləri 2021-ci ilə nisbətən 33 faiz artıb. Ötən il qeydə alınan 13 böyük sığorta hadisəsindən 7-si məhz yanğınlarla bağlı olub.
Hesabatda mexaniki zədələnmə hallarının 30 faiz artması gəmi donanmasının qocalması və heyət çatışmazlığı fonunda insan amili ilə əlaqələndirilir. Həmçinin pandemiyadan sonrakı inflyasiya nəticəsində poladın, ehtiyat hissələrinin və işçi qüvvəsinin bahalaşması təmir xərclərini əhəmiyyətli dərəcədə yüksəldib.
Mövcud vəziyyəti şərh edən "Cefor" sənaye oyunçularını itkilərin qarşısının alınmasına, yanğın təhlükəsizliyi qaydalarının sərtləşdirilməsinə və inflyasiya təzyiqi altında maliyyə ehtiyatlarının düzgün planlaşdırılmasına çağırıb.
